Intrigë si 'Babale'/ Inskenuan atentatin për të shmangur borxhet, burg dy vlonjatëve

Biznesmeni i ndërtimit në Vlorë Arben Veliko është dënuar me 1 vit e 4 muaj burgim për akuzën e “Kallëzimit të rremë”, pasi së bashku me Romarjo Alliaj, kanë përdorur një skenar të tipit “Babale”, duke inskenuar një atentat me armë, me qëllimin e vetëm shmangien e disa borxheve financiare.

Ngjarja e rëndë ndodhi në muajin maj 2019, ku një automjet tip “Golf 5” është qëlluar mbi 20 herë me automatik, dhe çuditërisht drejtuesi i makinës Alliaj, nuk kishte pësuar asnjë dëmtim fizik, megjithëse pjesa e makinës ku ndodhej shoferi ishte bërë shoshë nga plumbat.

Për këtë ngjarje kriminale prokuroria e Vlorës, ka kryer disa eksperimente ku ka dalë në përfundimin se situate kriminale e ndodhur në vendin e quajtur “Ura e Mifolit”, ishte e sajuar nga persona që kishin aktruar. Për më tepër që këto dyshime u përforcuan akoma kur Romarjo Alliaj,dy ditë pas ngjarjes doli në televizor dhe dha intervistë.

Policia dhe prokuroria e Vlorës, kanë kuptuar se biznesmeni Arben Veliko dhe Romarjo Alliaj, kishin thurur këtë intrigë të tillë me qëllim shmangien nga borxhet financiare. Në muajin qershor 2019 Veliko dhe Alliaj janë arrestuar, ndërsa pak kohë më parë të dy janë shpallur fajtorë dhe dënuar nga gjykata e Vlorës.

Trupi gjykues ka vendosur dënimin me 1.4 vite burgim Arben Velikon ndërsa me 1 vit e 8 muaj burgim është dënuar Romarjo Alliaj. Ky dënim për dy të pandehurit është dhënë, si pasojë e përfitimit të uljes së dënimit për shkak të gjykimit të shkurtuar. Intriga e tipit “Babale” dhe e vënë në jetë si në film aksion mes dy vlonjatëve është bërë në datën 12 maj 2019, në autostradën Vlorë-Fier, ku është qëlluar me armë zjarri një automjet, i cili ka dalë nga rruga dhe është përplasur.

Automjeti është qëlluar mbi 20 herë dhe gëzhojat janë shpërndarë në një distancë prej 200 metra, por çuditërisht vetë objektivi i këtij “atentati”, Romarjo Alliaj, ka shpëtuar mirë e bukur, pa asnjë gërvishtje.

TAG:
• Vlore
• Romarjo Alliaj
• Arben Veliko